2011年, 對我自己來講, 都算係一個好多變化的一年 
上半年時, 離開做左快近十年的工作去轉工, 年中時, 完成了一個BA (Hon) 的 Degree, 年尾時….重遊大阪…
1月左右, 某位舊同事告知我 佢公司而家請人, 人工亦幾理想,
雖然個職位比我當時的職位高一級 & 我自知經驗有限,
但佢對我好都幾有信心…建議我照去見工, 試一試….
超過9年幾 時間無 update過 自己份CV, 為了今次的挑戰,
拿拿聲搵返當年張CV + 過往幾年的 appraisal, 用左2晚時間整好張新CV 
SEND左 CV 去佢公司後一星期左右, 就收到電話通知, 要做一個telephone interview, 幸好當時舊公司唔係太忙, 我即日同當時的team head 告了半天假做呢個 telephone interview,
15分鐘時間, 全程英文介紹自己, 介紹自己而家的工作, 好耐無試過不停口地咁講英文….
再等一左一星期左右, 就收到電話告知2個星期後正式interview,
因為撞正農曆新年, 我只有3日時間去準備interview,
Interview好彩唔洗講英文, 當係傾計咁, 即場實戰2份文件…..
始終準備時間有限, 自己都知無乜信心, 不過都盡左力, 聽天由命啦…
3個星期後的一天, 準備收工之際, 收到新工的offer 電話,
HR 同我講左一輪OFFER 內容, 例如: 人工, 工作時間, BENEFIT 等等,
幸運地佢地無 壓我價, 當然一口應承,….
HR 話過兩日會在另一位同事通知簽約日期和時間, 並善意提醒我, 簽了約先好遞辭職信….
決定離開9年10個半月的公司, 真係有點唔捨得,
公司文化, 環境, 電腦SYSTEM, 樣樣都用到熟哂,
但人人都同我講, 魚唔過塘唔會肥, 
同埋, 新公司的人工對我來講真係幾理想, 今次真係一個好難得的機會,
所有野都要從新學習 & 適應, 唯有心口掛住個勇字, 死就死啦…
非常感恩, HR 安排了我去 介紹我轉工的個位同事 的一組,
我第一天返工, 我的新TEAM HEAD 帶我作新同事介紹時, 個個都話 : 「哦…你就係XX 介紹入來做果個丫….」
介紹我轉工的個位同事 係其中一個TEAM HEAD, 有佢的REFER, 新同事當中, 對我的態度和各方面也算不錯….
真係好感謝介紹我轉工的個位同事…. 佢真係我的貴人…幫了我很多很多…
面對新公司各樣的新環境新挑戰的同時, BA (Hon) Degree 的課程亦到了尾聲
試用期的三個月當中, 混合住 最後一次的上課, 2份功課 & Dissertation. 個半月時間內要完成…時間真係好迫…. 好大壓力…
轉了新工後, 不能再在公司上網搵料做功課, 呢點對我真係幾大影響,
以前在舊公司, 一有時間, 就可以上網搵料做功課, 搵到合用的, 可以save到USB 手指, 搵料當中,
有什麼想法都可以一氣呵成咁搵搵搵…
但轉了新工後, 雖然係可以上網, 但就唔可以save 到USB 手指, 非常唔方便
而且, 十幾廿人都係用同一部printer, 想print handout & journal 都好唔方便,
每次都要等lunch time 少人用printer 時先可以print out. 搵料就要留番返屋企搵…
要計住, 每2星期內要完成一份功課, 每個星期六日, 基本上都係做功課 or 返學校圖書館搵書做功課 & Dissertation. 交哂2份功課之後, 就要行turbo 做好份一萬字的Dissertation. 左搵右搵, 左抄右抄, 加加改改, 每完成一部份, 就email 比老公個堂妹幫我prove-reading 一下, 執靚d英文…..
順利地準時完成, 返學校print 埋 交埋 之後種感覺真係 如釋重負…爽呀…
工作方面, 剛過了試用期後就開始了公司re-structure project 的第一步, 由之前的一組分拆去另一層, 又再開始認識一班新同事, 會再學多好多野, 亦即係話比之前更辛苦…但今次呢一個轉變, 正幫助了我 趁亂世之時, 改了我今年的大假可以連在聖誕節之前一起放…亦做就了今年的 聖誕節大阪之旅!!
踏入10月, 正式開始了飲宴潮…做人情都做到窮.....
地點包括有: 跑馬地馬場飲2 次, 麗豪酒店1次, 最勁係 上水雙魚河馬會鄉村俱樂部 + 半島酒店…
一個露天戶外西式婚禮, 在中午時間舉行, 雖然陽光普照, 熱到一身大汗, 但仍然係一個好好的回憶,
正因為陽光普照, 我只用部 presume camera 影出來的相都好靚….
而晚宴方面在半島酒店擺酒, 派頭十足, 有幸參與其中, 真係好光榮…
可惜…食物味道並沒什麼想像中的好好味 or 驚喜 ….
忙完飲宴潮後, 就為我&老公的大阪之旅做功課…亦期待12月16日的畢業典禮
由cert course 到 dip course 再讀埋 BA (Hon) Degree, 十年時間內完成,
由此之終, 我一直都唔覺得自己可以讀到一個學位, 但當我讀完dip course之後, 打開 recruit 時, 發現好多公司都要求 degree holder, 而且, 好多 top-up degree 其實都要 high dip 先收, 我手上的一張 dip course cert 真係無乜幫助,
機緣之下, CityU & UK 的 University of Wolverhampton 合辦的top-up degree收左我
呢間U 在UK 排名其實好後, 唔係什麼出名的U, HK$90,160 讀20個月, 包11個 module & 1 份 dissertation, 唔洗考試, 全做功課, 0岩哂我呢d賴人
雖然好多人都話呢d top-up degree 無乜用, 用$$買學位,
但當市場上人人都係degree holder 0既時候, 你唔買呢張沙紙的話, 基本上你係連入場玩呢個遊戲都無機會…
幸好, 在舊公司的工作因為已經熟哂, 放假又容易, 返工返學基本都handle到, 只係轉左新工頭3個月時又功課又dissertation 比較辛苦…總算可以帶起頂四方帽上台領取張畢業証書
畢業禮在星期五舉行, 之後又要趕住北上飲宴, 我只安排了老公&亞爸去觀禮, 沒有找其他人來同我影相, 亦可能因為媽媽已走了, 雖然畢業禮照行, 但種感覺完全唔同之前cert course 時有媽媽在身邊一起分享時咁開心, 咁享受, 咁光榮…
聖誕之旅方面, 見今年轉工後, 儲多左錢, 再加埋政府派$6,000 計劃, 所以決定豪一次,
我要重遊大阪!!!!
在1996年, 亞媽第一次同我去日本, 第一站就係大阪, 京都, 奈良, 之後上名古屋, 尾站係東京, 當年係跟團, 好清楚記得只有45分鐘逗留 心齋橋, 導遊教我地第一站應該行大丸百貨, 亦因為旅程唔會重返景點, 睇中什麼就要決定買!
當年在大丸買的第一份禮物就係JPG 銀包 (十幾年前好興架), 仲記得當時兌返港幣好似係$4xx. 真係超抵…今次再去大阪, 我都係用呢個JPG 銀包!
而另一個指定景點就係 大阪城, 當年因為進行大型維修, 成座大阪城都封哂, 乜都睇唔到, 只係在 大阪城個廣告 睇下白鴿 和 個什麼博物館門口影下相, 好記得當時亞媽鬧話成座城封哂帶我地來睇把鬼咩 =_=’’ ….
一別15年, 今次選擇在聖誕旺季出發, 一係因為老公公司只放紅假期, (雖然我都夾左佢2日on-paid leave), 二係我好想試下在外地過聖誕
4日紅色假期出外旅遊都預左會貴, 亦問過人, 每人機票+酒店可能要一萬,
第一站去永安問, 坐CX, 出發時間唔係我想要的, 所以out!
第二站去東瀛遊, 都係坐CX, 加$2,550就可以 早機去晚機返, 每人大約$8,840, 問佢地有冇UO (Hong Kong Express), 因為會平好多, 但佢地話無位,
之後打電話去我平時幫襯開的 萬福旅行社, UO有位, 即時留名, 唔洗加$2,xxx 就可以早機去晚機返, 即刻鏍飯應!! 加埋4晚酒店 埋單每位 $6,630
仲平過08年12月頭去東京, 真係抵到難!!!
個半月時間不停上網搵料, 點搭車, 想食和牛, 又想shopping
日元兌港元己升到去1:10, 好多化妝品&護膚品 可能在香港買仲平,
好多時lunch 時間就會去行sasa & 卓悅格定價….
去圖書館借左7-8本大阪旅遊書, 一有時間就睇睇睇…做定哂功功課….
08年去東京個次, 發現了日本一個牌子 SAMANTHA THAVAS, 超鐘意佢地的手袋&銀包, 當時用了大約HK$1,6XX 買了一個白色的 SAMANTHA THAVAS 銀包, 雖然好肉赤, 亦明知白色好易污糟, 但因為真係好好好鐘意!!!
今次大阪之旅, 上網search 好哂 SAMANTHA THAVAS 的 shop & counter, 隨著目標進發!!!
大阪之旅總結:
想去的地方大部份都去到, 去唔到的地方唯有留待下次去時再行,
想買的 SAMANTHA THAVAS, 亦總算買到,
想食的和牛, 亦都食到, 真係好好味,
食唔到的 蟹樂道, 無緣吧!!! 等下次啦….
京都 & 環球片場, 好叉大風, 真係好凍好凍, 倆公婆都冷病左返來!! 齊齊睇醫生!!
一次貪心的激光美白free trial 時發現了自己面上唔知幾時惹到 過濾性病毒, 生了十幾粒好細粒的疣在面上, 好彩問左公司的醫保係包脫疣,, 最後在除夕當日下午, 去了朋友介紹的 醫學美容中心度 脫疣!! 要好好打理呢十幾個傷口仔, 減低留左面上的疤痕….
最後, 終於在2012年1月1日完成了 2011年我的大事回顧!!! Hurray!!!
Happy New Year...
祝願世界和平, 人人身體健康, 工作順利, 開開心心 ^o^
